ວັນທີ 22 ກັນຍາ 2026, ທີ່ຫ້ອງປະຊຸມສະໂມສອນ ວິທະຍາໄລພະລະສຶກສາ, ຄະນະພັກຮາກຖານ ວິທະຍາໄລພະລະສຶກສາ ໄດ້ຈັດກອງປະຊຸມເປີດກວ້າງ ປະຈຳໄຕມາດ III/2026 ແລະ ທິດທາງແຜນການ ປະຈຳໄຕມາດ IV/2026 ຂຶ້ນຢ່າງເປັນທາງການ.
ກອງປະຊຸມດັ່ງກ່າວຈັດຂຶ້ນໂດຍມີບັນດາສະມາຊິກພັກ, ພະນັກງານ-ຄູສອນ ແລະ ພະນັກງານບໍານານເຂົ້າຮ່ວມຢ່າງພ້ອມພຽງ, ເພື່ອສະຫຼຸບຕີລາຄາຜົນງານການເຄື່ອນໄຫວໃນໄລຍະຜ່ານມາ ແລະ ວາງທິດທາງສືບຕໍ່ປະຕິບັດໜ້າທີ່ໃນໄລຍະຕໍ່ໜ້າໃຫ້ມີປະສິດທິພາບສູງຂຶ້ນ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການຜ່ານຮ່າງບົດສະຫຼຸບການເຄື່ອນໄຫວວຽກງານ ປະຈຳໄຕມາດ III (ເດືອນ 07-09/2026) ແລະ ທິດທາງແຜນການ ປະຈຳໄຕມາດ IV (ເດືອນ 10-12/2026) ຂອງຄະນະພັກຮາກຖານ ວິທະຍາໄລພະລະສຶກສາ ໂດຍ ສະຫາຍ ວຽງໄຊ ນວນວິໄລ ຮອງເລຂາຄະນະພັກຮາກຖານ. ພ້ອມດຽວກັນນັ້ນ, ກອງປະຊຸມຍັງໄດ້ເປີດໂອກາດໃຫ້ສະມາຊິກພັກທຸກສະຫາຍ ໄດ້ປະກອບຄຳຄິດຄຳເຫັນຢ່າງກົງໄປກົງມາ ແລະ ສ້າງສັນ ເພື່ອເຮັດໃຫ້ບົດລາຍງານ ແລະ ແຜນການດັ່ງກ່າວມີສົມບູນຄົບຖ້ວນຍິ່ງຂຶ້ນ.
ນອກຈາກວາລະການສະຫຼຸບວຽກງານແລ້ວ, ພາຍໃນກອງປະຊຸມຍັງໄດ້ມີພິທີການອັນສຳຄັນ ແລະ ສົມກຽດ ດັ່ງນີ້:
- ຜ່ານລັດຖະດຳລັດ ວ່າດ້ວຍການປະດັບຫຼຽນກາລະນຶກ 50 ປີ ວັນສະຖາປະນາ ສປປ ລາວ ສະບັບເລກທີ 299/ປທກ, ລົງວັນທີ 20 ຕຸລາ 2025.
- ຈັດພິທີປະດັບຫຼຽນກາໃຫ້ແກ່ພະນັກງານ-ຄູສອນ ແລະ ພະນັກງານບໍານານ ທີ່ມີຜົນງານດີເດັ່ນໃນການປະກອບສ່ວນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ລວມທັງໝົດ 33 ສະຫາຍ (ຍິງ 16 ສະຫາຍ).
ໃນຕອນທ້າຍຂອງກອງປະຊຸມ, ໄດ້ມີການເຜີຍແຜ່ກົດລະບຽບພັກປະຊາຊົນປະຕິວັດລາວ ສະໄໝທີ XII ຂອງຄະນະຈັດຕັ້ງສູນກາງພັກ ປີ 2026 ໂດຍ ສະຫາຍ ຄຳສຸກ ອິນສະຫຼອງ ເລຂາຄະນະພັກຮາກຖານ ເພື່ອເປັນເຂັມຊີ້ທິດໃນການຈັດຕັ້ງປະຕິບັດວຽກງານການເມືອງ-ແນວຄິດ ໃຫ້ສະມາຊິກພັກທຸກສະຫາຍ, ກ່ອນທີ່ກອງປະຊຸມຈະໄດ້ປິດລົງຢ່າງເປັນທາງການດ້ວຍບັນຍາກາດອັນສະຫງ່າຜ່າເຜີຍ ແລະ ເຕັມໄປດ້ວຍຄວາມ ໝາຍອັນເລິກເຊິ່ງ.